A directora xeral de Saúde Pública da Consellería de Sanidade, Carmen Durán, expuxo na sede da Real Academia de Medicina de Galicia o modelo de saúde pública de Galicia, cualificado como referente no conxunto do Estado en materia de cribados e vacinación. A xornada, titulada 'Vacinar para protexer o corazón, a túa saúde e a túa vida', centrouse na importancia da prevención e a detección precoz de enfermidades.
Durán remarcou o obxectivo de seguir avanzando na prevención de enfermidades, na detección precoz e na anticipación aos problemas de saúde para evitar consecuencias máis graves para as persoas. Neste sentido, continuará o traballo para consolidar o calendario de inmunización ao longo de toda a vida, mantendo a protección da infancia e da adolescencia, e reforzando a inmunización dos maiores fronte ao herpes zóster e ao pneumococo. Tamén se manterán as investigacións na vida real, como o estudo Combogal coa vacina combinada de gripe e covid.
Na súa intervención, Carmen Durán tamén deu conta da integración cronolóxica de novas vacinas preventivas no calendario galego nos últimos catro anos e incidiu no liderado de Galicia en coberturas de vacinación tanto da gripe como da covid. Fixose referencia á importancia de incrementar a vacinación fronte á gripe do persoal sanitario e das embarazadas, un dos obxectivos da campaña deste ano.
Para rematar, a directora xeral afondou nos retos futuros en materia de vacinación, incidindo na necesidade de seguir a avanzar para mellorar as coberturas en todas as idades, especialmente en adultos.
