A conselleira de Política Social e Igualdade, Ángeles Vázquez, mantivo esta tarde un primeiro encontro coa directiva da Asociación Galega do Sector da Dependencia (Agasede) en Santiago de Compostela. Na xuntanza, analizouse as perspectivas de futuro do ámbito da dependencia.
Vázquez destacou que a atención ás persoas dependentes é un dos principais retos do Goberno galego, o que se reflicte nos orzamentos anuais. Lembrou que para o próximo ano a Xunta destina 972 millóns de euros a este eido, o que supón un investimento de 127 millóns de euros máis que no exercicio actual.
Na reunión tamén se abordou a situación dos recursos de atención ás persoas dependentes, os servizos dispoñibles e prestacións como o Bono Coidado no Fogar, que xa chega a máis de 43.000 persoas. A conselleira agradeceu a vontade de diálogo e trasladou o compromiso do Goberno galego en seguir traballando co tecido asociativo para mellorar a vida dos maiores.
