A iniciativa R(e)volución Plástica, impulsada pola Fundación Érguete, conta co apoio do Concello de Curtis. O proxecto desenvólvese no Centro Penitenciario de Teixeiro e ten como obxectivo principal dar unha segunda vida aos residuos plásticos xerados dentro do propio centro.
Grazas á instalación de maquinaria de reciclaxe, como unha trituradora e unha inxectora, e á formación dun grupo de persoas internas no seu manexo, os residuos plásticos convértense en novos obxectos útiles. Nesta primeira fase, prodúcense peites e perchas para a roupa, establecendo un modelo de economía circular.
O proxecto tamén representa unha oportunidade para o desenvolvemento de habilidades e a contribución a un futuro máis sostible e inclusivo. O Concello de Curtis reafirma o seu compromiso con iniciativas que xeran un impacto positivo a nivel social, ambiental e comunitario, convertendo residuos en recursos e creando novas oportunidades.
