O responsable informou que as contas da Xunta para 2027 destinarán case 520 millóns de euros ás políticas de vivenda, que abranguen a construción de novos fogares, a obtención de máis solo residencial e modificacións normativas para axilizar a posta a disposición de vivenda.
Dos 520 millóns de euros, 293 millóns corresponderán ao Instituto Galego de Vivenda e Solo, o que supón un incremento do 8,5% respecto a 2026. Ademais, o Consorcio do Casco Vello de Vigo, participado nun 90% pola Xunta e un 10% polo Concello, disporá de 2,7 millóns de euros para políticas de rehabilitación neste municipio.
Do orzamento total, asumido nun 80% con fondos propios autonómicos, 326 millóns de euros reservaranse á construción de novos fogares de promoción pública, duplicando a aposta do exercicio anterior.
García Porto tamén trasladou as medidas da Xunta para facilitar o acceso á vivenda pública, como a reserva do 20% das novas promocións para persoas inscritas no Rexistro de Demandantes por máis de 5 anos, o mantemento das axudas actuais para menores de 36 anos e de entre 36 e 45 anos con fillos, e a reserva do 40% das vivendas en alugueiro para a mocidade. Mantense o límite de ingresos de ata 4 veces o IPREM (ou 4,5 para familias numerosas).
As axudas específicas para facilitar o acceso á vivenda medran un 5,5%, superando os 46 millóns de euros, incluíndo o Bono Alugueiro Social, axudas ao alugueiro e específicas para mocidade ou adquisición de vivenda.
