O conselleiro de Presidencia, Xustiza e Deportes, Diego Calvo, e o presidente do Clúster, Pedro Iglesias, formalizaron hoxe a súa colaboración cun protocolo destinado a promover a actividade física e os hábitos de vida saudables entre a poboación galega. A sinatura tivo lugar durante a presentación do Plan 2 Millóns, unha iniciativa conxunta que busca que dous millóns de persoas practiquen deporte habitualmente en Galicia, coa finalidade de mellorar a saúde e a calidade de vida.
O Plan 2 Millóns estrutúrase en cinco eixos estratéxicos: saúde e comunidade, deporte social, espazos deportivos, educación e formación, e contorna laboral. O obxectivo é fomentar a práctica de actividade física en diferentes ámbitos e ao longo de toda a vida, a través da colaboración entre administracións, o tecido deportivo, empresas e entidades sociais.
A I Semana Galega da Actividade Física e a Saúde, que se celebrará do 5 ao 11 de abril de 2027, será o evento anual principal para activar e visibilizar o Plan 2M. Participarán concellos, centros educativos, clubs e outras entidades para achegar á cidadanía diversas formas de facer deporte.
Diego Calvo destacou que Galicia xa supera a taxa española en deporte federado, con máis de 311.000 licenzas. O reto actual é estender estes bos datos ao conxunto da sociedade, facilitando que o exercicio forme parte da rutina cotiá desde idades temperás.
Iniciativas como o programa de deporte escolar Xogade, que xa vai pola décimo oitava edición e alcanzou 147.000 escolares na pasada temporada, e Adestrar sen pantallas, que ofrece alternativas de lecer activo para adolescentes, son parte dos esforzos da Xunta.
O conselleiro recalcou que acadar os dous millóns de persoas activas require a colaboración de todos os ámbitos relacionados coa actividade física, incluíndo saúde, educación, administracións, empresas e entidades sociais.
Ademais, Diego Calvo subliñou a relevante dimensión económica da industria deportiva en Galicia. Segundo a Conta Satélite do Deporte, no ano 2024, o sector xerou máis de 731 millóns de euros de valor engadido e máis de 17.200 empregos directos.
