A Xunta licita por un importe de 654.731 euros a subministración de equipamento para os servizos de pneumoloxía e otorrinolaringoloxía do Hospital Público Novo Montecelo. As empresas interesadas teñen de prazo ata o 29 de xullo para presentar as súas ofertas.
O expediente, distribuído en dous lotes, ten como obxectivo adquirir material necesario para a exploración, diagnose e tratamento de patoloxías broncopulmonares nas salas de broncoscopia do servizo de Pneumoloxía da área sanitaria de Pontevedra e O Salnés.
Así mesmo, busca dotar o servizo de otorrinolaringoloxía cun láser CO₂ para a realización de procedementos cirúrxicos de alta precisión e seguridade, como amigdalectomías, microcirurxías de larinxe e estapedotomías, así como intervencións na área endolarínxea de etioloxía benigna e maligna.
Este contrato forma parte da planificación do Servizo Galego de Saúde para completar a dotación de equipamento do novo hospital, cun investimento previsto de 10.351.093 euros para o ano 2026. Durante este ano tamén se licitarán sistemas de anestesia, novo equipamento de radioterapia, mobiliario xeral e equipos informáticos.
Ademais, durante este mes de xullo, a Consellería de Sanidade licitará o contrato de servizos para o traslado definitivo ao novo hospital, cun importe de 688.933 euros. Con estas actuacións, a Xunta de Galicia completará neste ano un investimento superior aos 30 millóns de euros na dotación do Hospital Público Novo Montecelo.
