O novo índice pretende ir máis alá dos aspectos económicos, sanitarios ou educativos, para incluír como as sociedades valoran e conservan os ecosistemas. O obxectivo é reflexar a complexidade das relacións entre as sociedades e o seu contorno natural e a súa influencia no benestar humano e a sustentabilidade.
Neste contexto, Sebastián Villasante, investigador do programa Oportunius e IP de CRETUS, contribuirá ao índice cunha achega centrada nos ecosistemas mariños e costeiros. O seu traballo centrarase en desenvolver indicadores para avaliar os vínculos entre as persoas e o océano, considerando non só os recursos que proporciona, senón tamén a súa importancia social, cultural e ambiental.
Esta dimensión incluirá aspectos como os medios de vida das comunidades costeiras, os coñecementos tradicionais mariños, a identidade cultural, o coidado dos ecosistemas e a participación cidadá nas decisións sobre os recursos mariños.
As bases científicas do NRI presentáronse nun artigo na revista Nature en xuño de 2025. Actualmente, a Oficina do Informe sobre Desenvolvemento Humano do PNUD traballa no desenvolvemento do índice a través de achegas científicas e consultas.
Está previsto que o NRI se incorpore ao Informe sobre Desenvolvemento Humano de 2026. A contribución específica de Villasante á dimensión mariña e costeira desenvolverase en 2027, buscando traducir estas relacións en indicadores que axuden a comprender mellor os vínculos entre as persoas e os océanos e a orientar as políticas públicas.
