A Axencia de Turismo de Galicia estará presente na XIX edición da Expocatólica, a maior feira de turismo relixioso de América Latina, que se celebrará no Centro de Eventos Promagno de São Paulo (Brasil) do 23 ao 26 de xullo. Esta acción enmárcase na estratexia de promoción internacional do Camiño de Santiago e do Xacobeo 2027.
O certame reunirá máis de 200 expositores de diferentes continentes e espera unha afluencia superior aos 60.000 visitantes. Turismo de Galicia contará cun stand propio de preto de 30m², deseñado para informar sobre os Camiños de Santiago, pór en valor a oferta turística, o patrimonio histórico, a paisaxe e a gastronomía galegas. O obxectivo é xerar interese no destino Galicia e que os peregrinos prolonguen a súa estadía máis aló de Santiago de Compostela.
A participación responde á aposta polo turismo relixioso como eixo estratéxico para a desestacionalización da demanda turística e manter a chegada de peregrinos e visitantes durante todo o ano.
Brasil é un mercado estratéxico polo interese no fenómeno xacobeo, con numerosas Asociacións de Amigos do Camiño de Santiago que promoven a peregrinación. A feira servirá para fortalecer os vínculos entre Brasil e Galicia arredor do Camiño.
No 2025, 8.467 peregrinos brasileiros recibiron a compostela. A presenza de Turismo de Galicia na feira busca reforzar a internacionalización do destino e consolidar o Camiño de Santiago e o Xacobeo 2027 nos mercados emisores internacionais.
