O director de Turismo de Galicia, Xosé Merelles, destacou hoxe na Cidade da Cultura, en Santiago de Compostela, que a nova convocatoria de axudas á eficiencia enerxética demostra a aposta da Xunta de Galicia por un sector turístico máis eficiente, sostible e respectuoso co medio ambiente.
Esta iniciativa busca promover a redución do consumo enerxético e impulsar o uso de enerxías renovables para diminuír a pegada de carbono da actividade turística. Merelles lembrou que desde 2022, a Xunta xa investiu máis de 14M€ en apoio a 200 establecementos turísticos neste ámbito.
A convocatoria actual, aberta desde o pasado 7 de setembro e ata o 7 de decembro, dispón de 9M€ para os exercicios 2026 e 2027. As axudas dependerán do aforro enerxético acadado, que deberá ser como mínimo do 30%.
Para poder optar a estas subvencións, os proxectos deberán ser integrais, combinando medidas de eficiencia enerxética con investimentos en enerxías renovables. As actuacións subvencionables inclúen a mellora da envolvente dos edificios, a renovación da iluminación, e a implantación de instalacións de enerxía solar térmica, xeotermia, biomasa, aerotermia, hidrotermia e sistemas fotovoltaicos para autoconsumo.
