A Airas Nunes Aula de Cámara, un espazo de encontro entre agrupacións de cámara ou solistas e recoñecidos músicos e pedagogos europeos, ofrecerá un total de seis concertos na cidade. Estes eventos están deseñados para estudantes de posgrao/máster e grao superior, así como para alumnos aventaxados dos últimos cursos de grao profesional.
A concelleira de Capital Cultural, Míriam Louzao, destacou o apoio municipal a este tipo de actividades, subliñando que a cultura é "un dereito". Lembrou ademais que todos os concertos son de acceso libre e gratuíto para o público.
A programación inclúe actuacións de diversos grupos e solistas, con obras de compositores como L. Van Beethoven, C. Schumann, W.A. Mozart, R. Schumann, G. Mahler, M. Ravel, P. Schoenfeld, Duo Pavageau- De Diego, Duo ArCo & Quinteto Invicta e F. Schubert, C. Franck.
Os concertos terán lugar en diferentes espazos da cidade, como a Sala Mozart do Auditorio de Galicia, A Casa das Máquinas, o Teatro Principal e o CGAC, con horarios variados entre as 12.00 e as 20.00 horas.
