O prazo de presentación de ofertas para esta actuación, que busca mellorar as condicións de conservación e o comportamento térmico do edificio, permanecerá aberto ata o 24 de novembro ás 14:00 h. O proxecto inclúe traballos de mantemento exterior e actuacións no interior da planta baixa, que presenta problemas de filtracións de auga.
No exterior, as tarefas centrarase na limpeza, reparación e tratamento dos paramentos pétreos, así como na intervención nas reixas e carpinterías. Tamén se revisarán e restaurarán elementos deteriorados e actuarase nas cubertas e puntos da envolvente que requiran reparación para protexelos da entrada de auga.
No interior, mellorarase o illamento térmico da planta baixa coa incorporación de solucións de illamento na envolvente e a creación dunha cámara de aire no perímetro. Esta medida contribuirá a reducir as humidades procedentes dos muros e a mellorar as condicións de uso e conservación do espazo.
O proxecto tamén contempla o acondicionamento dos espazos da planta baixa e a intervención nas dependencias anexas, con reparacións e melloras nas instalacións afectadas polas filtracións. A planificación dos traballos terá en conta a continuidade do funcionamento da Praza de Abastos, compatibilizando a execución coa actividade habitual do mercado.
A torre de servizos centrais é un dos elementos máis representativos do Mercado de Abastos de Santiago, proxectado por Joaquín Vaquero Palacios e construído entre 1937 e 1941. O edificio está catalogado cun nivel de protección que recoñece o seu elevado valor histórico, arquitectónico e cultural.
