A Xunta de Goberno da cidade de Santiago de Compostela, na súa sesión do 27 de xullo de 2026, deu luz verde ás bases que rexerán o concurso para a adxudicación de vinte e nove (29) autorizacións de licenzas de taxi adaptado.
O obxecto destas bases é regular o procedemento de adxudicación, mediante concurso público, destas 29 licenzas de taxi adaptado, destinadas á prestación do servizo público discrecional de transporte de viaxeiros/as en vehículos de turismo dentro do termo municipal de Santiago de Compostela.
As solicitudes, que deberán cumprir co formulario específico MO046, presentaranse preferentemente por medios electrónicos a través da sede electrónica, no trámite denominado “[Adxudicación de licenzas de autotaxi e de transporte lixeiro de mercadorías](https://sede.santiagodecompostela.gal/sta/CarpetaPublic/doEvent?APP_CODE=STA&PAGE_CODE=CATALOGO&DETALLE=6269000926179230599500)”. Alternativamente, poderán ser presentadas de forma presencial no Rexistro Xeral do Concello de Santiago de Compostela ou por calquera outro medio establecido na Lei 39/2015.
O prazo para a presentación de solicitudes iniciarase ao día seguinte da publicación destas bases no Boletín Oficial da Provincia da Coruña e finalizará o 18 de setembro de 2026. Cada persoa interesada só poderá presentar unha única solicitude para optar a unha soa licenza.
