O Portal de Contratos Públicos da Xunta de Galicia publicou a licitación para a subministración sucesiva de oito medicamentos biolóxicos, cun importe inicial de 20.814.061,95 euros. Estes tratamentos están destinados a patoloxías complexas que se abordan nos hospitais de día do Servizo Galego de Saúde (Sergas).
O procedemento inclúe a adquisición de fármacos intravenosos para enfermidades oncohematolóxicas, inmunomediadas (como enfermidade inflamatoria intestinal ou artrite reumatoide), esclerose múltiple e diversas enfermidades raras, entre elas a hemoglobinuria paroxística nocturna e a síndrome hemolítica urémica atípica.
Os fármacos a adquirir, distribuídos en oito lotes por principio activo, son: Bevacizumab, Eculizumab, Infliximab, Natalizumab, Rituximab, Tocilizumab, Trastuzumab e Ustekinumab.
O contrato terá unha duración inicial de dous anos, con posibilidade de prórroga ata un máximo de cinco anos, acadando un valor estimado de 54.036.507 euros (sen IVE). O Sergas empregará a modalidade de compra centralizada por primeira vez en cinco destes medicamentos.
Esta medida, sumada á expiración de patentes e á entrada de biosimilares, permitirá un aforro anual de 6.201.681 euros, o que supón un 38% menos. Ademais do impacto económico, o obxectivo principal é asegurar a calidade asistencial.
As empresas interesadas teñen de prazo ata o 20 de agosto para presentar as súas ofertas.
