O secretario xeral de Universidades, José Alberto Díez de Castro, subliñou no Parlamento de Galicia o traballo dos científicos nestes centros, que acadan recoñecementos como a acreditación María de Maeztu. Explicou que cada euro investido pola Xunta nestes centros xera un retorno duns tres euros en captación de fondos externos, o que evidencia a súa capacidade para transformar o investimento público en recursos adicionais, talento e coñecemento de excelencia.
O persoal investigador supón o 58,6% do total do cadro de persoal das tres universidades públicas galegas, situando a Galicia como primeira comunidade de España neste eido. A rede CIGUS, conformada por dez centros (cinco da Universidade de Santiago de Compostela, tres da Universidade de Vigo e dous da Universidade da Coruña), actúa como ferramenta clave para impulsar o crecemento económico e o desenvolvemento coa I+D+i como motor.
Estes centros concentran 44 proxectos distinguidos con axudas do Consello Europeo de Investigación (ERC), contan con 44 spin offs activas e rexistran un incremento do 94% na produción de publicacións en coautoría internacional nos últimos seis anos. O representante da Xunta expresou o orgullo de país por ter centros públicos de alto nivel que demostran a competitividade de Galicia na investigación.
Para captar máis talento internacional de alto nivel, a Xunta está a traballar en dúas novas iniciativas: a Fundación Galtia e o proxecto europeo Talentgal. Ademais, na última convocatoria incorporáronse como centros colaboradores o CITEEC (da UDC), e o CINTECH e ECOBAS (ambos da UVigo), con aspiracións de sumarse á rede proximamente.
