A Universidade de Buenos Aires (UBA), unha das institucións académicas máis recoñecidas de Latinoamérica, concedeu o título de Doutor Honoris Causa ao catedrático da UDC Ricardo García Mira. Esta distinción premia a súa salientable traxectoria científica, académica e institucional, así como as súas importantes contribucións internacionais nos campos da psicoloxía social e ambiental, a sustentabilidade e o estudo das relacións entre as persoas e o seu contorno.

A decisión foi aprobada polo Consello Superior da Universidade de Buenos Aires o pasado 10 de xuño de 2026. O acto de investidura, onde García Mira recibirá formalmente o título, celebrarase o vindeiro mes de novembro na sede da institución arxentina. Esta máxima distinción académica subliña a proxección internacional da súa carreira e o seu impacto no avance do coñecemento sobre desafíos sociais e ambientais contemporáneos.

Ricardo García Mira é catedrático de Psicoloxía Social e Ambiental na Universidade da Coruña (UDC), onde desenvolveu unha destacada carreira investigadora durante máis de tres décadas. Doutor en Psicoloxía pola Universidade de Santiago de Compostela (USC), dirixiu o Grupo de Investigación Persoa-Ambiente da UDC e foi profesor visitante e honorario en varias institucións internacionais. Ademais, é recoñecido como Fellow da International Association of Applied Psychology e foi presidente da International Association for People-Environment Studies (IAPS).

A súa produción científica foi clave para consolidar a psicoloxía ambiental como un campo fundamental para entender a transición ecolóxica, a sustentabilidade, a calidade de vida, a participación cidadá e a resposta social ante o cambio climático. Liderou numerosos proxectos europeos e internacionais sobre estilos de vida sostibles, innovación social e políticas públicas para a sustentabilidade.

A UBA destaca non só a excelencia académica e científica de García Mira, senón tamén a súa capacidade para conectar o coñecemento coas retos sociais actuais, fortalecendo os vínculos entre investigación, políticas públicas e cidadanía. Esta distinción súmase a outros recoñecementos internacionais e consolida un compromiso coa excelencia, a cooperación científica e o desenvolvemento sostible.

A Universidade de Buenos Aires incorpora así a Ricardo García Mira á lista de personalidades que fixeron contribucións excepcionais ao progreso científico, cultural e social, reforzando os lazos académicos entre Europa e América Latina.

Entre outras distincións recentes, García Mira é Doutor Honoris Causa pola Universidade “Alexander Ioan Cuza” de Iasi (Romanía, 2018), Catedrático Honorario do Instituto de Investigación en Políticas Públicas da Universidade de Bath (Reino Unido, 2016-2027) e Titular da Cátedra Honoraria “Ching-Ching Hung-Dao” da Universidade Nacional Tsing Hua (Taiwán, 2026), ademais de ser profesor visitante en universidades como Cornell University (Nova York, 2020).