O encontro, titulado Europa ao servizo das empresas de Galicia, reuniu a entidades clave como a Confederación de Empresarios de Galicia (CEG), a Enterprise Europe Network, a Axencia Galega de Innovación (GAIN), UNINOVA e a Cámara de Comercio de Santiago de Compostela. A xornada serviu para analizar o futuro do sector marítimo e pesqueiro, ademais de detallar os recursos dispoñibles para o tecido empresarial.
Durante a sesión, destacouse o papel do programa Erasmus para Xóvenes Emprendedores, que facilita estancias formativas en empresas estranxeiras para novos empresarios. Con máis de 15.000 intercambios realizados a nivel europeo, esta iniciativa permite adquirir coñecementos prácticos e establecer alianzas estratéxicas internacionais.
Pola súa banda, a Enterprise Europe Network consolidouse como a rede de asesoramento máis extensa do mundo, con presenza en 59 países. Os seus socios en Galicia ofrecen apoio técnico para acceder a programas de I+D+i, asesoramento en sustentabilidade e axuda para a participación en políticas europeas.
