A Consellería do Mar, a través de Portos de Galicia, finalizou esta mañá a reparación do sistema de apertura automática da comporta que pecha a dársena de Malpica, garantindo así o abrigo da frota pesqueira. Esta actuación de urxencia, levada a cabo por un equipo de mergulladores, recupera o funcionamento normal do sistema, que desde o pasado mércores requiría dunha apertura manual.
Os mergulladores retiraron diversos materiais de refugallo, incluída unha cadea, que impedían o movemento da estrutura no fondo mariño. Unha vez detectado o problema e eliminados os obstáculos, a comporta volveu operar de forma automática dende esta mañá.
Técnicos de Portos de Galicia supervisaron os traballos submarinos, iniciados a primeira hora do día. Mantiveron ademais un contacto permanente co patrón maior da confraría de Malpica para informar sobre a resolución da avaría.
