O Concello de Santiago de Compostela pon en marcha a Plataforma Loxística de Distribución de Mercadorías, un nodo clave para a recepción e reparto de cargas na Cidade Histórica. O obxectivo principal é diminuír a presenza de vehículos de reparto, utilizando para iso vehículos de cero emisións de tamaño e peso reducidos, promovendo así a sustentabilidade ambiental, a eficiencia na mobilidade e a protección do patrimonio.
Este proxecto, presente en documentos estratéxicos do Concello e do Consorcio desde 2017, conta cun amplo consenso administrativo. A plataforma centralizará as mercadorías, reducindo desprazamentos, ruído, consumo enerxético e a pegada de carbono. Ademais, evitará o colapso de vehículos nos horarios de carga e descarga e desaxogará o uso de rúas prioritarias para os peóns.
A necesidade desta infraestrutura en Santiago de Compostela radica na protección da Cidade Histórica, esixindo a redución do tráfico rodado para minimizar o impacto sobre os inmobles e pavimentos, e a creación dunha zona de baixas emisións con reducida contaminación acústica para mellorar a calidade de vida.
A iniciativa foi promovida polo Concello de Santiago e financiada con fondos europeos Next Generation EU, ademais de contar cunha subvención da Secretaría Xeral de Transportes e Mobilidade. Sitúase nunha parcela ao norte do Polígono del Tambre, na Vía de la Cierva, preto de Mercagalicia.
Inicialmente, a plataforma servirá o núcleo da Cidade Histórica, coa previsión de estenderse progresivamente á zona monumental. Espérase que estea rematada e equipada no primeiro trimestre de 2026, iniciando operacións a partir dese momento. A adhesión será opcional, pero a Cidade Histórica é unha zona de baixas emisións (ZBE), polo que será obrigatorio o uso de vehículos de 0 emisións para os repartos.
A plataforma atenderá todo tipo de actividades e establecementos que reciban ou envíen mercadoría no centro histórico, incluíndo hostalería, restauración, comercio alimentario e non alimentario, así como servizos de administracións, igrexa ou universidade. A implantación será gradual, comezando polas actividades con maior carga.
