A iniciativa busca concienciar á cidadanía sobre os perigos asociados a episodios de choiva intensa e as medidas preventivas recomendadas para as áreas de risco potencial significativo de inundación (Arpsi). Esta sinalización forma parte do Plan estratéxico de divulgación das áreas de risco (Pedarpsi) e dá continuidade a traballos similares noutras zonas sensibles de Galicia-Costa.
Segundo o Plan de Xestión de Risco de Inundación (PXRI) da Demarcación Hidrográfica Galicia-Costa, a zona do río Sar pertence ao grupo IV, caracterizado pola alta perigosidade e risco de desbordamentos. A colocación destes elementos pretende mellorar a conciencia pública sobre a dinámica fluvial e reforzar a seguridade cidadá.
Esta actuación en Santiago de Compostela, cun investimento superior aos 5.793 euros, enmárcase nun contrato máis amplo de Augas de Galicia para a concienciación e divulgación do risco de inundación. O organismo xa sinalizou áreas de alto risco en 37 concellos galegos, empregando diferentes formatos de carteis, incluíndo os xerais e os infantís.
Ademais da sinalización, Augas de Galicia desenvolve obradoiros en centros educativos próximos ás áreas de risco para concienciar ás novas xeracións sobre os asolagamentos e a influencia das accións humanas no contorno fluvial. Estas accións reforzan o compromiso coa prevención e xestión sostible de inundacións, en liña co PXRI vixente ata 2027 e a directiva comunitaria.
