As renovadas instalacións do IES Aquis Celenis en Caldas de Reis marcan un punto de inflexión na educación local. Tras un investimento de case seis millóns de euros, a Xunta de Galicia acometeu a obra de maior envergadura nun centro de ensino na actualidade, transformando radicalmente a capacidade e a calidade das súas ensinanzas.
Despois dun ano e medio de obras, con dificultades técnicas e molestias para a comunidade educativa, a reforma foi inaugurada oficialmente este xoves. Ao acto asistiron, ademais do presidente Alfonso Rueda, o conselleiro de Educación, Román Rodríguez; o alcalde, Jacobo Pérez; o presidente da Deputación de Pontevedra, Luis López; e o delegado territorial da Xunta en Pontevedra, Pablo Fernández, entre outras autoridades.
Os representantes da Xunta destacaron o compromiso do Goberno galego cun sistema educativo público moderno e accesible. A modernización deste edificio, con case 40 anos de antigüidade, era unha prioridade para incrementar prazas, ofrecer máis oportunidades á mocidade e garantir un espazo cómodo, seguro e eficiente para os case 350 alumnos, 39 docentes e 9 profesionais non docentes.
O conselleiro de Educación anunciou tamén a intención de ampliar a oferta formativa do centro co grao de Formación Profesional no futuro. A subdirectora xeral de Construcións e Equipamentos, Rosa María Soñora, detallou que os traballos incluíron a ampliación en 2.000 m², a creación de 34 aulas novas, un novo ximnasio, vestiarios, e a renovación de cuberta, carpintarías, luminarias LED e falsos teitos acústicos.
O alcalde, Jacobo Pérez, cualificou a reforma como "un investimento de futuro que vai facer mellor a vida dos veciños".
“"A reforma do centro, a pesar de supoñer unha mellora moi necesaria, queda curta."
Pola súa banda, o BNG de Caldas manifestou que a reforma "queda curta", xa que non resolve algunhas das carencias fundamentais que padece a comunidade educativa. Ademais, reclaman unha ampliación da oferta formativa para responder ás necesidades da comarca.
