O titular da carteira sanitaria, acompañado polo director xeral de Integración e Innovación Asistencial do Sergas, Alfredo Silva, e polo xerente da área sanitaria de Lugo, A Mariña e Monforte de Lemos, Ramón Ares, visitou hoxe no Hospital Lucus Augusti o Autobús do Cerebro. Esta iniciativa da Sociedade Española de Neuroloxía enmárcase na Semana do Cerebro.
O Código Ictus, operativo desde 2016, coordina a resposta asistencial ante unha sospeita de accidente cerebrovascular, activando os recursos necesarios para garantir que o paciente reciba o tratamento máis axeitado canto antes. O sistema sanitario galego ten evolucionado coa extensión das unidades de ictus, tratamentos de reperfusión, capacidade para realizar trombectomías e o reforzo da atención neurolóxica nos hospitais do Sergas.
O Hospital Universitario Lucus Augusti ten dado pasos importantes, contando cunha unidade de ictus que achega unha resposta máis rápida aos pacientes da súa área. Ademais, dispón dunha atención neurolóxica especializada con consultas monográficas e proxectos innovadores como a primeira Neuroescola de Galicia.
O Autobús do Cerebro ofrece información personalizada e probas para coñecer a saúde cerebrovascular, ademais de recomendacións para manter un cerebro san. O conselleiro subliñou a importancia da concienciación, xa que as enfermidades neurolóxicas teñen un gran impacto na saúde e calidade de vida. Ata o 90% dos ictus están relacionados con factores de risco modificables, e unha parte relevante das demencias e epilepsias poderían previrse ou atrasarse actuando sobre estes factores.
O conselleiro citou hábitos saudables como o exercicio, o control da tensión arterial e da diabetes, unha alimentación equilibrada, o coidado do sono e evitar o tabaco e o alcohol. Tamén recalcou a necesidade de garantir unha resposta rápida, coordinada e especializada cando aparece unha enfermidade neurolóxica.
Gómez Caamaño resaltou que iniciativas como esta son unha oportunidade para concienciar sobre a importancia de coidar a saúde cerebral e destacou a preparación do sistema galego para responder ante estas enfermidades. Agradeceu á Sociedade Española de Neuroloxía o seu labor de divulgación e concienciación, e eloxiou o traballo dos equipos de Neuroloxía e demais servizos implicados na prevención, diagnóstico, tratamento e seguimento dos pacientes.
