As festas de Santa Margarida en Mourente volveron á vida este sábado despois de máis de 20 anos, cunha celebración que comezou cun pasarrúas pola mañá e unha degustación gratuíta de mexillóns pola tarde. A xornada inaugural rematou cunha verbena nocturna amenizada pola orquestra Sinfonía da Coruña e a disco móbil La Duendeneta.
As celebracións continuarán este domingo no recinto da capela e do carballo. A xornada inclúe pasarrúas cos grupos Os Alegres e O Son da Pedra Meiga, unha misa solemne ás 12:00h seguida de procesión e sesión vermú coa Banda de Música de Meaño. A festa culminará cunha gran tirada de fogos artificiais ás 14:00h.
A comisión de festas destacou que este "fin de semana histórico" foi posible grazas ao esforzo da veciñanza e da propia comisión, que traballou durante meses para recadar os 21.000 euros necesarios para revitalizar esta festividade tan arraigada na identidade local.
O renacer desta celebración supón o reencontro co patrimonio de Mourente, unha parroquia con historia que foi concello independente entre 1841 e 1872, e que posúe un rico pasado que inclúe o descubrimento dunha necrópole calcolítica e un notable legado arquitectónico e relixioso.
O epicentro da festa é a contorna da capela de Santa Margarida, construída entre finais do século XIII e principios do XIV, que conserva elementos medievais. Ao carón da capela atópase o Carballo de Santa Margarida, unha árbore monumental con máis de cincocentos anos, herdeira da antiga Carballeira dos Gafos, e que foi mencionada por figuras como o Padre Sarmiento e Castelao.
A parroquia volve reencontrarse cunha tradición que nunca desapareceu da memoria popular. A comisión de festas convida a todos a achegarse a Mourente para desfrutar da música, dos reencontros e da alegría compartida, honrando o traballo comunitario e o legado dos devanceiros.
