A visita enmárcase no acto académico de apertura do curso 2026/2027 do Mestrado Universitario en Xestión Empresarial do Deporte da Universidade de Vigo. O evento, que comezará ás 17.00 h na aula magna José Ángel Valente do edificio Xurídico-Empresarial, será presentado polo decano da Facultade, Jesús Vázquez, e o coordinador do mestrado, Patricio Sánchez.
Segundo Patricio Sánchez, esta será a primeira vez que o secretario de Estado para o Deporte visite o campus ourensán, o que representa unha oportunidade única para coñecer de preto a actualidade política do sector deportivo.
José Manuel Rodríguez Uribes, doutor en Dereito e profesor titular de Filosofía Xurídica e Política, conta cunha extensa traxectoria. Foi Ministro de Cultura e Deporte (2020-2021), director xeral de Apoio a Vítimas do Terrorismo (2006-2011), director do Instituto Universitario de Dereitos Humanos Bartolomé de las Casas (2016-2018) e titular da Cátedra Antonio Berinstain sobre o Terrorismo e as súas Vítimas. Ademais, foi delegado do Goberno na Comunidade de Madrid (2018-2019) e deputado na Asamblea de Madrid, ademais de embaixador de España ante a Unesco (2021-2023).
Patricio Sánchez subliña o papel fundamental do Consejo Superior de Deportes (CSD) como máximo responsable do deporte estatal, clave para o presente e futuro do sector. Entre os retos actuais, destaca o desenvolvemento da nova Lei do Deporte, a consolidación dunha nova estrutura orgánica que integre institucións públicas e privadas, a loita contra a dopaxe, a promoción do deporte e saúde, a súa integración no currículo escolar e a organización de grandes eventos internacionais, como uns hipotéticos Xogos Olímpicos con Madrid como sede.
Esta conferencia marca o inicio da 16ª edición do Mestrado en Xestión Empresarial do Deporte da UVigo, un programa oficial de posgrao único en Galicia. O título, que cobre todas as súas prazas, destaca pola súa boa acollida internacional e foi recoñecido no ránking internacional de SportBusiness como o primeiro de España, segundo de Europa e duodécimo a nivel mundial.
