O director da Axencia Galega da Calidade Alimentaria da Consellería do Medio Rural, Martín Alemparte, mantivo unha xuntanza en Santiago de Compostela con responsables da Fundación RIA. O obxectivo foi estudar a posibilidade de impulsar novas vías de colaboración para desenvolver conxuntamente a formación no sector agrogandeiro, con especial énfase na gandería extensiva de ovino e caprino.
A reunión centrouse nos módulos de aptitude empresarial agraria, esenciais para os mozos e mozas que se incorporan por primeira vez á actividade a través das axudas convocadas pola Consellería. Ademais, abordáronse novas iniciativas para promover o selo Artesanía Alimentaria, un distintivo de calidade galego que garante a elaboración tradicional de produtos agroalimentarios.
