A Consellería do Medio Rural publicou hoxe no Diario Oficial de Galicia (DOG) a resolución de axudas por valor de 360.000 euros destinadas a financiar programas de mellora e control da calidade e da orixe dos produtos agroalimentarios galegos amparados por distintivos de calidade diferenciada. Estas achegas benefician a 16 consellos reguladores.
O obxectivo destas subvencións é apoiar a implantación e o desenvolvemento dos programas de control, asegurando o alto nivel de rigor e as garantías que caracterizan aos produtos galegos de calidade diferenciada. O control é fundamental para garantir ao consumidor a orixe, autenticidade e calidade dos produtos identificados no mercado.
O sistema de control abarca todas as denominacións de orixe e indicacións xeográficas protexidas galegas. Cando os consellos reguladores non reciben estas axudas, a Axencia Galega da Calidade Alimentaria leva a cabo directamente as tarefas de control, garantindo o cumprimento dos requisitos establecidos nos pregos de condicións.
O Goberno galego reforza así o seu apoio ás 36 denominacións de orixe e indicacións xeográficas protexidas existentes en Galicia, así como á calidade diferenciada galega en xeral, que tamén inclúe a produción ecolóxica e a Artesanía Alimentaria. Estes distintivos son unha ferramenta clave para xerar valor engadido, fortalecer as producións territoriais e ofrecer maiores garantías aos consumidores.
Entre os gastos subvencionables atópanse os derivados da participación do persoal dos consellos reguladores nas tarefas de control, como desprazamentos, manutención e aloxamento. Tamén se inclúen gastos en equipamento técnico, ferramentas informáticas e material de laboratorio necesarios para estas funcións.
