A medida responde á suspensión temporal da actividade de recollida de moluscos cultivados, provocada pola presenza de biotoxinas nas rías galegas. Segundo o informe da Consellería do Mar, a convocatoria busca paliar o impacto económico derivado desta situación, que obrigou a interromper a produción durante períodos prolongados.
O orzamento total, de 2,7 millóns de euros, conta cunha cofinanciación do 70 % a cargo do Fondo Europeo Marítimo, de Pesca e de Acuicultura (FEMPA), mentres que o 30 % restante é achegado pola Comunidade Autónoma de Galicia.
Para acceder a estas compensacións, as empresas acuícolas deben acreditar que a suspensión da actividade se prolongou durante máis de catro meses consecutivos. Os polígonos que cumpren estes requisitos, segundo os datos do Instituto Tecnolóxico para o Control do Medio Mariño de Galicia (Intecmar), son Bueu A, Bueu B, Cangas A e Cangas B.
