As obras, que comezarán este mesmo ano unha vez finalizada a tempada de alto risco de lumes, inclúen a construción dunha nova pista, plataforma e accesos, así como un edificio para albergar aos pilotos. A previsión é que as melloras estean rematadas a finais do ano 2027.
A base tamén se dotará de novas instalacións exteriores, como depósitos de auga e retardantes, un novo cerramento perimetral e iluminación. Con estas actuacións, o aeródromo terá capacidade para operar simultaneamente ata seis avións de loita contra incendios.
O presidente da Xunta, Alfonso Rueda, destacou que estas melloras responden ao obxectivo de modernizar unhas instalacións con 30 anos de vida e subliñou o traballo na prevención e na dotación de medios de extinción.
O proxecto, enmarcado no plan da Consellería do Medio Rural, conta cun cofinanciamento do 75% do programa Interreg Poctep de cooperación transfronteiriza entre España e Portugal. As actuacións céntranse na mellora de infraestruturas contra o lume, incluíndo outras bases en Lalín, Valga, Portas e Tui.
Estas accións dan continuidade a investimentos realizados no 2024, como a execución das bases de unidades operativas en Muíños, Rianxo e Mondoñedo, e a base transfronteiriza de Verín-Oímbra.
