Ambas as propostas musicais actualizan melodías do folclore galego a través de novos arranxos e instrumentación contemporánea, sen perder a esencia orixinal. Os concertos comezarán a partir das 21:00 horas.
Maricarme, un trío formado por artistas con recoñecida traxectoria como Cibran Seixo, María Jorge e Migui Carballido, presentará o xoves 16 un adianto do seu primeiro EP. O seu son fresco mestura violíns, pandeiros, bouzouki e electrónica, transitando entre a tradición oral e composicións propias. O grupo xa actuou en festivais como o Festival Maré, Festiletras ou a Foliada da Fonsagrada.
O venres 17 será a quenda de Unto Vello, un dúo composto por Bieito Pereira e Xabi Gómez. O seu traballo reinterpreta a música tradicional, engadindo novas sonoridades co acordeón e rendendo homenaxe ás cantareiras. Foron finalistas dos Premios Martín Códax da Música en 2025 e presentan o seu primeiro disco, Inmaterial.
O ciclo Atardecer no Gaiás continuará ata o 14 de agosto con outras propostas musicais, incluíndo bandas como Bala, Sheila Patricia, Lisdexia, Galician Army e Turista Sueca. Ademais, o venres 13 de agosto celebrarase o Atardecer Fest, dedicado á música urbana.
Esta iniciativa, que conta coa colaboración de Cervezas Alhambra, forma parte das máis de 3.600 actividades impulsadas pola Consellería de Cultura, Lingua e Xuventude na campaña de verán Para gustos, cultura.
