Esta iniciativa busca incorporar unha ferramenta complementaria para detectar especies que quedan fóra dos inventarios convencionais polo seu tamaño, a súa distribución, o seu comportamento, as dificultades de mostraxe ou de identificación.
O punto de partida desta técnica de investigación é que todos os organismos deixan restos do seu material xenético no medio no que viven. A partir deles, é posible obter información sobre as especies que utilizaron ese espazo, sen necesidade de localizalas directamente, o que resulta moi útil para detectar organismos pequenos, pouco abundantes ou difíciles de observar.
A recollida de mostras, que se fará tanto nas costas expostas como nas zonas abrigadas, no Lago dos Nenos e en distintos hábitats terrestres, repetirase ao longo do ano para cubrir a variación estacional e combinar información de diferentes momentos e lugares.
Unha vez obtida a mostra, o ADN extraído someterase a técnicas de secuenciación masiva. O metabarcoding permitirá obter, a partir dunha soa mostra, información de numerosos grupos de organismos e elaborar un perfil da comunidade detectada. A interpretación dos resultados require bases de datos de referencia adecuadas, polo que o proxecto comeza coa elaboración de catálogos das especies coñecidas nos dous parques.
O estudo pretende que os seus resultados sexan aplicables noutros espazos da Rede de Parques Nacionais e avaliar ata que punto o ADN ambiental pode converterse nunha ferramenta útil para a monitorización da biodiversidade.
