Estes novos inspectores e subinspectores, que se distribuirán polas sete áreas sanitarias galegas, centrarán o seu labor especificamente no seguimento das incapacidades temporais que duren menos de 365 días, xa que as de maior duración son xestionadas polo Instituto Nacional da Seguridade Social (Inss).

A medida, anunciada polo presidente da Xunta, Alfonso Rueda, tras a reunión semanal do Consello, forma parte das propostas xurdidas na Mesa do Diálogo Social de Galicia, coa participación da patronal galega CEG e os sindicatos CC.OO. e UGT. O reforzo contará cun orzamento de case 3 millóns de euros para os próximos tres anos.

Ademais, modificouse o protocolo de xestión clínica e seguimento das baixas para facelo máis resolutivo. Acordouse que as mutuas xa non precisarán un permiso particular para cada proba, senón unha autorización única por paciente para realizar os tratamentos e probas necesarias. A inspección sanitaria pública manterá sempre a última palabra na ratificación das altas propostas polas mutuas, chamando directamente ao interesado se existen dúbidas sobre a xustificación da alta.

O presidente Rueda destacou que estas accións forman parte dun plan integral para controlar o absentismo laboral, un problema "constatado por moitísimos colectivos empresariais". Galicia lidera o país en duración media das baixas (75 días), e o plan especial activado en 2024 xa revisou 132.000 IT, resultando nunha alta na cuarta parte dos casos. Os controis intensificáronse en Lugo, Ferrol, Santiago e A Coruña, e agora o foco está en Vigo.

Desde xaneiro de 2025, os hospitais tamén expedirán os partes médicos de baixa para pacientes ingresados con cirurxía programada, aliviando a carga burocrática de enfermos e Atención Primaria. Paralelamente, facilitouse a incorporación das probas diagnósticas das mutuas ao historial electrónico do Sergas para evitar duplicidades.

Respecto ás urxencias hospitalarias, Rueda rexeitou as críticas sobre o "bloqueo" de contratacións, afirmando que se reforzaron estas áreas con 150 médicos máis e incrementos retributivos. Tamén se adoptaron medidas extraordinarias en hospitais con "máis dificultades de cobertura asistencial", como o complexo de Ourense ou o Hospital da Mariña, e reivindicou o impulso da Xunta para a creación da especialidade de Medicina de Urxencias.

O mandatario pediu "sentidiño" ao colectivo de urxenciólogos, asegurando que o esforzo da Xunta non é recoñecido por algúns xefes de servizo que emitiron un comunicado conxunto a pasada semana.