As actuacións, enmarcadas no Plan de nova arquitectura pedagóxica da Xunta, consisten na substitución da cuberta inclinada actual de tella cerámica por outra nova do mesmo material. Procederase á demolición da infraestrutura existente e á desmontaxe da base de fibrocemento con amianto.
Unha vez demolida a cuberta, colocarase un illamento de 10 centímetros de polistireno sobre a cara superior do forxado. Complementariamente, substituiranse os canlóns e as baixantes por outros de chapa de aceiro galvanizado, co obxectivo de mellorar a eficiencia enerxética do centro.
O representante do Goberno galego destacou que esta intervención forma parte dun programa máis amplo que busca a mellora integral dos centros educativos galegos, orientada á integración dos edificios no espazo urbano, á mellora dos exteriores, á creación de espazos de socialización, á optimización da distribución interior e á aposta pola eficiencia enerxética.
Na súa visita ao Colexio de Sandiás, Manuel Pardo tamén puxo en valor o investimento global da Xunta na provincia de Ourense, que supera os 60 millóns de euros en 731 actuacións. Delas, 39 son grandes obras cun importe de case 30 millóns, ademais doutras intervencións menores e proxectos comprometidos como o novo instituto do Pereiro de Aguiar.
