O Goberno galego, a través do secretario xeral da Emigración, Antonio Rodríguez Miranda, e da delegada da Xunta no Uruguai, Elvira Domínguez, trasladou o seu respaldo á labor das entidades galegas residentes no país suramericano. A reunión tivo lugar na Delegación da Xunta en Montevideo.
Durante o encontro, destacouse o traballo fundamental destas asociacións para o mantemento da colectividade galega e a difusión das tradicións de Galicia no Uruguai. Esta iniciativa forma parte da estratexia do Executivo galego para fortalecer a rede de entidades no exterior, co apoio da Delegación autonómica.
O Uruguai alberga máis dunha decena de colectivos galegos, a maioría concentrados en Montevideo. Destaca o Centro Gallego de Montevideo, fundado en 1879, recoñecido como a entidade galega no exterior máis antiga do mundo.
Rodríguez Miranda puxo en valor o papel destas organizacións como puntos de encontro e transmisoras da cultura e tradicións galegas, animando os presentes a preservar a identidade e a fortalecer os lazos con Galicia.
No transcurso da xuntanza, tamén se sinalaron dúas datas relevantes para a diáspora galega: o vindeiro Consello de Comunidades Galegas en Río de Xaneiro (novembro) e o Día da Galicia Exterior, que se celebrará en xullo no contexto do Ano Xacobeo.
