A decisión foi tomada pola Oficina Técnica da Seca ante o descenso sostido dos recursos hídricos e a persistencia de precipitacións por debaixo dos niveis habituais. Esta declaración de seca prolongada, que afecta a 123 concellos (59 en alerta e 64 en prealerta), non implica por si mesma restricións nos usos e consumos de auga, pero prevé limitacións sobre usos non prioritarios como o baldeo de rúas ou a rega de xardíns nas zonas en alerta.
O conselleiro de Medio Ambiente e Cambio Climático, Nicolás Vázquez, xunto co director de Augas de Galicia, Roi Fernández, participou na reunión da Oficina Técnica da Seca, na que tamén forman parte Protección Civil, MeteoGalicia e as Consellerías de Sanidade e do Medio Rural.
Os encoros de abastecemento de Galicia-Costa sitúanse ao 38,04% da súa capacidade, case 27 puntos menos que o ano pasado. A fase de prealerta, que afecta a 64 concellos, implica unha vixilancia reforzada e a promoción dun uso responsable da auga.
Os concellos en alerta inclúen áreas de Ferrol, A Coruña, a costa de Pontevedra e Vigo. Na zona do río Mandeo e da ría de Betanzos atópanse en prealerta concellos como Betanzos, Oleiros e Sada, mentres que na área dos ríos Landro e Ouro están en prealerta Foz e Viveiro, entre outros.
