A conselleira de Medio Ambiente e Cambio Climático, Ángeles Vázquez, presentou no Concello da Estrada a resolución desta orde de axudas, que financiará un total de 170 actuacións. O obxectivo principal é contribuír ao cumprimento da normativa estatal e europea nesta materia e acadar un modelo de xestión de residuos máis eficiente e equitativo.
A maior parte do financiamento, máis de 3 millóns de euros, destinouse á recollida e tratamento de biorresiduos, incluíndo iniciativas de recollida separada, adquisición de vehículos específicos e implantación da compostaxe. Outras liñas apoiaron a xestión de residuos téxtiles (125.000 euros), a modernización de puntos limpos fixos (1,3 M€) e a mellora dos puntos limpos móbiles (350.000 euros).
Ademais, incluíuse unha nova liña de axudas de 290.000 euros para apoiar proxectos de dixitalización dos servizos municipais de residuos, buscando unha maior trazabilidade dos refugallos.
A conselleira destacou o Concello da Estrada como exemplo de xestión eficiente e sostible, sendo o municipio da provincia de Pontevedra con maior financiamento concedido e o segundo de Galicia, cun total de 233.000 euros. Este concello actuará na mellora da recollida separada de biorresiduos, adquirirá un vehículo eléctrico para residuos orgánicos, modernizará o punto limpo fixo e comprará un punto limpo móbil.
Desde 2018, o Goberno galego xa destinou preto de 40 millóns de euros a centos de iniciativas municipais para mellorar a xestión de residuos, modernizar puntos limpos, promover a compostaxe, fomentar a reutilización e reforzar a recollida separada.
