O municipio pontevedrés da Estrada participa na campaña estival ‘Un alento de vida’, organizada pola Axencia de Doazón de Órganos e Sangue (ADOS). A iniciativa busca recoller preto de 22.000 doazóns de sangue ata finais de agosto e fomentar a participación cidadá, para o que as unidades móbiles da Axencia visitarán máis de 170 concellos galegos.
A unidade móbil da ADOS estará estacionada na Praza do Concello mañá, venres 31 de xullo, en horario de 10:00 a 14:00 e de 16:00 a 21:00 horas. A Axencia subliña a necesidade diaria de 400 doazóns para manter o abastecemento nos hospitais, unha cifra que se mantén crítica nos meses de verán.
A campaña 'Un alento de vida' tamén busca concienciar sobre a importancia da doazón para o tratamento de moitos doentes no sistema público de saúde. Os participantes recibirán un agasallo, como unha almofada ou un balón de praia, e poderán interactuar cun espazo que simula unha terraza de verán, inflando un globo que simbolizará o 'aire' que supón unha transfusión para os enfermos.
A Estrada rexistrou no pasado 2025 unha taxa de 63 doazóns por cada 1.000 habitantes e ano, sumando 1.264 doazóns totais, un índice que se atopa entre os máis elevados de Galicia e supera a media autonómica (39/1.000).
Desde a Axencia convidan a toda a cidadanía a participar, lembrando que poden doar sangue persoas maiores de 18 anos, con máis de 50 quilos de peso e sen enfermidades transmisibles polo sangue. Para máis información, ADOS dispón do sitio web ados.sergas.gal, redes sociais e o teléfono gratuíto 900 100 828.
