A xornada deste xoves estará marcada pola chegada de tormentas que afectarán a toda a comunidade galega, poñendo fin ás altas temperaturas que se rexistraron a semana pasada, cando se alcanzaron os 40 graos nalgúns puntos.
A provincia de Lugo será a máis afectada por este cambio meteorolóxico, con alertas amarelas e laranxas por fortes precipitacións e tormentas que comezarán pola tarde. Segundo a previsión de Meteogalicia, estas tormentas concentraranse na Montaña de Lugo, onde a alerta é laranxa, e estenderanse por toda a comunidade, incluíndo Santiago de Compostela e A Coruña.
As correntes de aire frío en altura están a xerar ceos nubrados que ameazan con fortes chuvias. As temperaturas tamén experimentarán un descenso notable, non superando os 30 graos en toda Galicia e chegando a marcar 25 graos en Santiago. As mínimas tamén baixarán, con localidades que poderían rexistrar ata 9 graos pola noite.
En Santiago de Compostela, as precipitacións chegarán pola tarde, arredor das 16:00 horas, cun 55% de probabilidade. Aínda que non haberá alertas por tormentas, as choivas continuarán ata a noite. As temperaturas serán máis agradables, con máximas de 25 graos e mínimas de 15.
Estas tormentas prevé que cesen para a xornada do venres, cunha porcentaxe de choiva que descende ata o 20%, augurando un inicio de fin de semana máis estable e favorable para toda Galicia.
