A Consellería do Medio Rural informou da extinción do incendio forestal rexistrado na parroquia de Escuadra, no concello da Lama. O lume, que se orixinou ás 04,19 horas de onte, foi dado por extinguido ás 13,35 horas deste venres.
Finalmente, o incendio afectou unha superficie total de 26,69 hectáreas. Delas, 23,69 hectáreas correspondían a monte raso e as 3 hectáreas restantes eran de arborado.
Para a súa extinción mobilizouse un dispositivo que incluíu 1 técnico, 11 axentes, 20 brigadas, 18 motobombas, 2 pas, 3 helicópteros e 5 avións.
A Consellería do Medio Rural recorda á cidadanía a importancia de alertar sobre calquera lume forestal chamando ao número gratuíto 085. Tamén se dispón da aplicación móbil ALume para avisar sobre incendios activos e dun teléfono anónimo, 900 815 085, para denunciar actividades incendiarias sospeitosas.
Ademais, a información actualizada sobre incendios forestais que superan as 20 hectáreas pode consultarse na conta de X @incendios085.
