Baiona ilumínase de verde por enfermidades mitocondriais

O Concello de Baiona iluminouse de verde na noite de hoxe para dar visibilidade ás Enfermidades Mitocondriais e mostrar apoio a todas as persoas afectadas e ás súas familias.
Con este xesto, o municipio únese á iniciativa #LightUpForMito e contribúe a dar voz a quen convive a diario con estas enfermidades pouco frecuentes, ademais de recoñecer o labor da asociación @AEPMI_mitocondrial durante a Semana Mundial das Enfermidades Mitocondriais.

Iluminar os edificios de verde tamén serve para facer visible unha realidade que moitas veces permanece oculta. Trátase de sensibilizar, concienciar e lembrar que detrás de cada diagnóstico hai unha persoa, unha familia e unha historia que merece ser escoitada.

Hoxe, Baiona tingiuse de verde para reivindicar máis visibilidade, comprensión, investigación e apoio para as persoas con enfermidades mitocondriais.