O arcebispo de Santiago, Monseñor Prieto, participará nos actos centrais da inminente visita do Papa León XIV a España, que se desenvolverá entre o 6 e o 12 de xuño. Nunhas declaracións previas á súa viaxe a Madrid, o arcebispo compartiu a súa confianza en que o Pontífice poida realizar unha peregrinación a Santiago de Compostela no ano 2027, coincidindo coa celebración do Xacobeo.
A visita do Papa a España, que inclúe paradas en Madrid, Barcelona e Canarias, é vista polo arcebispo como un motivo de "esperanza, ilusión e motivación". Destaca a importancia da "presenza e a palabra do Papa", así como o lema da visita, "Alzad la mirada", que anima a "descubrir no noso contorno unha humanidade que require unha mirada tamén como crentes e dende a fe".
“"O papa León XIV vai darnos a través das súas palabras, a súa presenza e os seus xestos un momento importante que imos vivir con ilusión, con emoción, e tamén dende a fe, posto que para os crentes quen nos visita é o papa León; é dicir, é Pedro."
Monseñor Prieto acompañará ao Santo Pai nos actos principais en Madrid, Barcelona e Canarias, representando á Igrexa compostelá. Agárdase a viaxe de grupos de mozos e parroquias dende Santiago para participar nestes eventos.
A invitación para que o Papa peregrine a Santiago no Ano Santo 2027 foi cursada persoalmente polo arcebispo a principios de xaneiro. "Temos unha esperanza ben fundada de que se cadra o papa León poida acompañarnos e ser un peregrino que veña a Santiago o próximo Ano Santo", afirmou, recoñecendo que a axenda papal é intensa e a súa preparación require "unha acción que é silenciosa e discreta".
Ao facer balance dos seus tres anos como arcebispo, iniciados o 3 de xuño de 2023, Prieto destacou a riqueza da arquidiócese, que abarca dende Ferrol ata Vigo, pasando por cidades como A Coruña, Santiago e Pontevedra. Sinalou os retos de atender unha diocese con 1069 parroquias, a dispersión rural e o envellecemento fronte á concentración urbana, así como a necesidade de "axentes pastorais" para manter a presenza da Igrexa.
Reiterou a súa defensa da "acollida de migrantes" dende o "respecto á persoa" e a necesidade de "regularizar e normativizar" a situación, lembrando o "dereito a vivir na propia terra" e o "dereito a buscar unha oportunidade" cando este non é posible. "Detrás de cada migrante hai unha persoa, unha historia, unha biografía", subliñou.
Detrás de cada migrante hai unha persoa, unha historia, unha biografía...
O proceso de renovación da arquidiócese inclúe a "xeografía pastoral" e a "reconfiguración" da atención a través de "unidades pastorais integradas nos arciprestazgos", así como o "acompañamento de iniciación cristiá" para todas as idades. Tamén se está a traballar na elección dun "bispo auxiliar", coa confianza de que poida contar co apoio nos próximos meses, especialmente de cara ao Ano Santo.
Finalmente, referiuse á consolidación do Seminario Maior Interdiocesano 'Apóstolo Santiago', un proxecto conxunto con Mondoñedo-Ferrol e Tui-Vigo, que busca unha formación integral para futuros sacerdotes nunha comunidade de maior número para enriquecer o proceso formativo.
