O conselleiro de Educación, Ciencia, Universidades e FP, Román Rodríguez, inaugurou en Santiago de Compostela o XXVII Encontro Nacional de Estudantes de Matemáticas. Este evento congrega durante esta semana a unhas 300 persoas participantes de todas as facultades de España. Rodríguez salientou o liderado universitario de Galicia no eido matemático a nivel estatal, destacando que a Facultade de Matemáticas da Universidade de Santiago de Compostela se atopa no quinto posto no ranking das 50 mellores de España, segundo a publicación de El Mundo.
O titular de Educación do Goberno galego tamén subliñou a aposta da Xunta por reforzar a aprendizaxe das matemáticas nas aulas galegas. O obxectivo é preparar “o mellor posible” ás novas xeracións de estudantes, recoñecendo o peso “cada vez maior” dos coñecementos en áreas como as matemáticas, a física ou a intelixencia artificial para o futuro profesional e laboral. Neste sentido, a Xunta de Galicia impulsa unha folla de ruta específica a través do Plan MEGA, de mellora educativa, que fomenta as competencias clave.
Román Rodríguez felicitou á organización do encontro, que inclúe unha ampla axenda de charlas e relatorios para o intercambio e actualización de coñecementos entre expertos académicos e empresariais. Emprazou aos estudantes a aproveitar o evento para coñecer os últimos avances, tendencias e aplicacións prácticas nesta área.
