O Concello de Lugo puxo en marcha un plan para a recuperación progresiva do río Miño como espazo de ocio, deporte e convivencia. A alcaldesa, Elena Candia, presentou o proxecto que busca revitalizar a contorna fluvial para o goce dos veciños durante o verán.
A primeira medida xa é visible coa instalación de pantaláns flotantes, grazas á colaboración coa Federación Galega de Piragüismo. Estes pantaláns, adquiridos no anterior mandato e sen uso ata agora, permitirán a celebración de campionatos e facilitarán un acceso máis cómodo e seguro ao río, ademais de servir como modelo de recuperación.
O plan municipal tamén inclúe a promoción de actuacións compatibles coa protección ambiental, como o mantemento da limpeza das ribeiras e a mellora da accesibilidade en zonas como Os Robles, O Chapuzo, a Fábrica da Luz e as inmediacións da UNED.
Paralelamente, o Concello actuará en espazos próximos ao río, destacando a creación dunha nova piscina pública ao aire libre con xogos acuáticos nunha parcela nos Robles. Aínda que esta actuación non poderá estar lista este verán por trámites administrativos, habilitaranse actividades recreativas na zona.
A alcaldesa sinalou o éxito da piscina exterior de Frigsa, con 4.300 usuarios nos seus primeiros dez días, como reforzo da necesidade de ampliar a oferta acuática ao aire libre.
Ademais, estanse a realizar traballos de limpeza e eliminación de vexetación na contorna da Fábrica da Luz para mellorar a súa imaxe, reducir o risco de incendios e preparar o terreo para o seu acondicionamento. Próximamente iniciaranse reunións coa Consellería de Medio Ambiente e a Confederación Hidrográfica Miño-Sil para consensuar o proxecto e avanzar nas autorizacións.
