O conselleiro de Presidencia, Xustiza e Deportes, Diego Calvo, acompañado da directora xeral de Mobilidade, Judit Fontela, participou hoxe na Conferencia Sectorial de Transportes en Madrid. Calvo lamentou a ausencia do ministro de Transportes e Mobilidade Sostible, Óscar Puente, escudándose na celebración do Consello de Ministros, e cualificou o feito de "falta de respecto" e "tomadura de pelo".
Calvo afeou que, tras catro anos sen convocarse a conferencia, a pesar da insistencia das comunidades autónomas, o ministro non estivese presente para tratar directamente as súas demandas. Considerou que, de ter interese, Óscar Puente podería terse incorporado á xuntanza.
O Ministerio incorporou á orde do día cuestións reclamadas por Galicia, como o financiamento do transporte público, o novo mapa concesional por estrada ou a situación do sistema ferroviario. O conselleiro incidiu en que a reactivación da Conferencia Sectorial só terá sentido se o debate se traduce en compromisos verificables e nunha interlocución estable coas comunidades autónomas.
Respecto ao servizo ferroviario, Diego Calvo sinalou que Galicia rexistrou preto de 130 incidencias nos últimos 12 meses, o 60% delas no último semestre, maioritariamente por atrasos, avarías e problemas nas infraestruturas. Reiterou a demanda da Xunta de contar cun interlocutor oficial con Renfe e Adif, así como dun rexistro público de incidencias.
Lamentou a falta de diálogo e transparencia sobre o estado dos servizos e infraestruturas ferroviarias en Galicia e o plan director do Corredor Atlántico. Insistiu na urxencia de impulsalo e resolver os atrasos que sofre en Galicia con respecto a outros territorios.
Diego Calvo reiterou o rexeitamento da Xunta á decisión do Goberno central de non actuar sobre o cambio de ancho de vía en Galicia, limitando a competitividade e a liberalización ferroviaria. Instou o Ministerio a dar prioridade ao cambio de ancho ibérico a internacional entre Ourense e Santiago de Compostela e a finalizar o desdobramento da vía única entre Madrid e Galicia, así como ás obras pendentes no AVE Vigo-Porto e nas conexións A Coruña-Ferrol-Lugo.
No transporte por estrada, Diego Calvo insistiu na necesidade de manter no novo mapa concesional todos os servizos suprimidos e reforzar as conexións de Galicia con Madrid, Salamanca e o norte peninsular.
En financiamento do transporte público, o conselleiro reclamou coñecer os importes con antelación, axilizar as convocatorias e evitar os atrasos nos pagamentos, que obrigan a Galicia a adiantar fondos propios.
Durante a reunión tamén se abordou o desenvolvemento da Lei de Mobilidade Sostible, o programa do Abono Único, o Plan Social polo Clima e as infraestruturas viarias do Estado. Galicia defendeu unha maior participación das comunidades autónomas nos novos órganos de gobernanza previstos pola norma, criticando a creación do Consello Superior de Mobilidade Sostible e o Foro Territorial.
Respecto ao Abono Único, esixiu concreción xurídica e financeira, respecto das competencias autonómicas, garantir a interoperabilidade e evitar a dependencia tecnolóxica. Sobre o Plan Social polo Clima, que prevé 9.000 millóns de euros para España (máis de 4.000 para transporte), Galicia defendeu que os fondos financien servizos existentes e admitan vehículos ECO.
A Xunta reclamou que no reparto se teñan en conta factores como a dispersión e o envellecemento, e apostou por novas liñas de actuación para a planificación integrada da mobilidade e a loxística de última milla. Esixiu coñecer o tratamento dado ás 62 actuacións propostas por Galicia, valoradas en máis de 2.000 millóns de euros.
No referido ás infraestruturas viarias do Estado, Diego Calvo lamentou a espera de compromisos vitais para a comunicación coa Meseta e a vertebración interna, como a A-54 (Santiago-Lugo), a A-76 (Ourense-Ponferrada), a A-56 (Lugo-Ourense) e a A-74 na Mariña. Tamén mencionou actuacións pendentes nas cidades como a humanización da entrada da AP-9 en Vigo, o enlace orbital de Santiago ou a reforma do nó de bombeiros en Pontevedra.
O conselleiro tamén incidiu na preocupación polo mantemento do firme en vías esenciais como a A-6 ou a A-52, e da rede nacional de estradas, cuxo estado cualificou de "pésimo".
