A Garda Civil puxo fin á actividade dunha organización criminal internacional dedicada ao roubo de perfumes e tabaco en varios aeroportos europeos, entre eles o de Santiago. A operación, que tivo unha forte actuación na comarca compostelana con rexistros en Teo e Padrón, saldouse con once persoas detidas e desmantelou por completo o coñecido como Clan Preda.
A investigación, iniciada a principios de 2025 e levada a cabo conxuntamente pola Sección Fiscal e de Fronteiras dos aeroportos de Santiago e Tenerife Sur, xunto co Servizo de Vixilancia Aduaneira da Coruña e coa colaboración de Europol, as autoridades portuguesas, romanesas e británicas, permitiu desmantelar a rede. Os axentes atribúen aos arrestados, de nacionalidades romanesa, arxelina e maliense, un total de 24 delitos, incluíndo pertenza a organización criminal, furtos continuados, contrabando de produtos do tabaco, falsidade documental e branqueo de capitais.
Segundo as pescudas, a banda operaba no aeroporto de Santiago e noutros aeroportos de España, Portugal e Bélxica. Alí subtraían principalmente perfumes e labores de tabaco mediante un reparto de funcións. Posteriormente, a mercadoría era trasladada por vía aérea ata o Reino Unido, onde se distribuía ilegalmente a través de establecementos xestionados por cidadáns kurdos e paquistanís.
As detencións dos principais membros producíronse tras tres rexistros autorizados xudicialmente: un nunha vivenda de Teo e dous en naves industriais de Padrón. Interviñéronse teléfonos móbiles, diñeiro en distintas divisas, un lingote e pezas de ouro, gran cantidade de tabaco e abundante documentación.
A investigación tamén sacou á luz unha trama de branqueo de capitais baseada en sociedades dedicadas á compravenda de vehículos de segunda man. Bloquéanse 13 contas bancarias en España, 12 en Lituania e 24 en Romanía, ademais de localizar oito sociedades instrumentais que serviron para dar aparencia de legalidade a fondos procedentes da actividade delituosa.
A Garda Civil estima que a organización chegou a branquear máis de 4,8 millóns de euros. Incautáronse 2.221 cartóns de tabaco, máis de 109 quilos de picadura, 42 vehículos e outros 51 quedaron embargados preventivamente.
