A actual campaña de escavacións na parroquia de Santa María Madalena de Adai, en Lugo, profundará nos traballos iniciados entre 2023 e 2025 no Corro dos Mouros. A investigación centrarase en dous abrigos, destacando a Pena Travesa, que alberga un petróglifo con deseños complexos de cazoletas e un gravado único en Europa dun fondo de cabana duns 40 m2.
Segundo explica a directora dos traballos, a profesora da USC e investigadora do CISPAC, Pilar Prieto, este achado permitirá "completar o coñecemento dunha paisaxe sagrada". Ademais, a investigación inclúe a catalogación de seis mámoas e dous petróglifos novos na zona.
Está prevista unha prospección xeofísica para finais de setembro co obxectivo de identificar posibles restos de estruturas arqueolóxicas no subsolo, o que podería organizar futuras investigacións. Os traballos actuais comezaron o 31 de agosto e rematarán o 18 de setembro.
Como parte da campaña, o 17 de setembro, ás 17.00 horas, realizarase unha visita guiada de acceso libre polos xacementos escavados de Penas do Caldeiro.
Esta iniciativa está financiada polo proxecto ‘RODAS -Yacimientos funerario-rituales singulares del Final de la Edad del Bronce a la Edad de Hierro en el Noroeste Ibérico. Plan Nacional de PROYECTOS DE GENERACIÓN DE CONOCIMIENTO 2024’ da Axencia Estatal de Investigación (Ministerio de Ciencia, Innovación e Universidades do Goberno de España), e polo proxecto de ‘Consolidación e estructuración 2025 GRC GI-1553 EcoPast’ da Xunta de Galicia.
