A localidade boirense de Cabo de Cruz acollerá do 14 ao 16 de agosto a XVIII Exaltación do Mexillón. A concelleira de Cultura, María Outeiral, e o presidente da organización, Abel Sánchez, presentaron o programa, que busca promover o mexillón das rías galegas e o seu valor económico e laboral.
A festa, que se recuperou hai tres anos, inclúe un pregón a cargo de Gerardo Triñanes, expresidente da Asociación Galega de Carpintería de Ribeira (Agalcari). As actividades comezarán o venres 14 cun espectáculo de circo, degustacións de mexillón en tres variedades e un concerto de Luis Fercán.
O sábado 15 haberá unha charla sobre os desafíos do cultivo do mexillón impartida polo investigador do CIIMAR Sergio Fernández Boo. Tamén se realizarán showcookings con Alberto Lareo e Iago Pazo, sesión vermú amenizada por Xoubas, degustacións de petiscos e un concerto de Versionettes.
O domingo 16, día grande, ofrecerase un menú-degustación con catro elaboracións de mexillóns, combinando receitas tradicionais e innovadoras. Actuará o grupo O Ar de Loureda. A organización prevé repartir unhas 8.000 racións.
O Concello de Boiro achegou máis de 3.000 quilos de mexillóns para os establecementos hostaleiros locais, que servirán petiscos gratuítos durante toda a semana.
