O alcalde de Becerreá, Manuel Martínez, expresou a súa "satisfacción total e absoluta" pola disposición da actual presidenta da Deputación de Lugo, Carmela López, para pór en marcha a residencia de anciáns da localidade. O rexedor local celebrou que se busque "resolver un problema que se enquistou" por mor do seu predecesor no cargo, o socialista José Tomé, a quen cualificou como "psicópata narcisista, rencoroso e incompetente".
O alcalde, que no seu momento militou no PSdeG-PSOE e foi a cabeza visible da oposición a Francisco Cacharro Pardo na Deputación de Lugo, goberna agora este municipio da Montaña de Lugo como independente, a través da formación Galicia Sempre (GaS).
En declaracións a COPE Lugo, agradeceu a disposición de Carmela López para solventar o asunto: "Agrézolles á presidenta actual a súa disposición para solucionar este asunto, que se había engangrenado".
O bloqueo do proxecto chegou aos xulgados e o Tribunal Superior de Xustiza de Galicia (TSXG) xa emitiu unha sentenza firme que insta á apertura da residencia. A posta en marcha estaba prevista para 2023, tras un convenio de colaboración asinado pola Deputación e o Concello de Becerreá en 2016.
“"Creo na palabra da presidenta da Deputación"
Para o alcalde, trátase de "un problema creado artificialmente, sen explicación de ningún tipo". Manuel Martínez engade que "con boa disposición e sentido común, como dixo a actual presidenta, pódese solucionar nun tempo razoable, porque a disposición é total e absoluta".
Tras unha reunión de seguimento na que participaron Carmela López e Manuel Martínez, a Deputación de Lugo anunciou que levará á próxima Xunta de Goberno a licitación do equipamento do centro de maiores. Este é "un paso que permitirá seguir avanzando" na preparación para "a súa entrada en funcionamento".
“"Queremos que esta residencia se abra e dea servizo a unha comarca que ten unha poboación avellentada e dispersa"
A impresión de Manuel Martínez tras o encontro é "moi satisfactoria". "Creo que a solución ao problema está encamiñada. Creo na palabra da presidenta da Deputación. Queremos que esta residencia se abra e dea servizo a unha comarca que ten unha poboación avellentada e dispersa", declarou o rexedor.
Finalmente, Manuel Martínez volvía aludir a José Tomé. "O mesmo que impedía que se abrise, reclamáballe a outras administracións o que el non facía". Con todo, preferiu mirar cara adiante e resolveu: "Pero iso é auga pasada, imos mirar ao futuro con esperanza".
