O Ciclo de Mestre Mateo Galicia Calidade, froito da colaboración entre a Xunta de Galicia e a Academia Galega do Audiovisual, levará oito pezas de ficción e animación a 26 concellos galegos. Esta iniciativa busca fomentar a difusión da produción audiovisual galega en formato curto, especialmente en localidades que non dispoñen de salas comerciais estables.
Tras pasar por Cea e Vilalba, o circuíto continuará este mes con proxeccións en Meira (15 de xullo) e Ribadavia (28 de xullo). O programa, que se desenvolve baixo a campaña de verán da Consellería de Cultura, Lingua e Xuventude 'Para gustos, cultura', estenderase ata outubro e incluirá paradas en concellos das catro provincias galegas.
As obras divídense en dúas sesións: unha de imaxe real e outra de animación. Na categoría de ficción poderanse ver 'Abellón', 'Algo novo que contar', 'Curmán' e 'Adeus, Berta'. Estas pezas abordan temáticas como a identidade, a presión social, a maduración e as relacións familiares.
No bloque de animación figuran 'Lucus', unha aventura de fantasía con comedia; 'Nuno', que explora a conexión dunha persoa nova cun tío falecido; 'O mesmo', centrada na violencia dixital de xénero; e 'O corpo de Cristo', que trata sobre a procura de curación a través da ciencia, a fe e a tradición.
Varios destes filmes contaron con subvención da Consellería de Cultura, Lingua e Xuventude para o seu desenvolvemento. O ciclo está financiado pola Axencia Galega das Industrias Culturais e o Instituto de Cinematografía y de las Artes Audiovisuales.
