A través da concellaría de Xestión do Medio Natural e Atención ao Medio Rural, o Concello de Ames reactiva a súa iniciativa anual para o control da Vespa velutina. Esta primeira fase da campaña céntrase na captura das raíñas, que nestes meses abandonan os seus refuxios invernais para establecer novos niños. Unha segunda etapa de trampeo está prevista para os meses de setembro e outubro, dirixida ás novas raíñas que xurdan.
Os participantes nesta campaña deberán asinar un compromiso para asegurar que o trampeo se realice exclusivamente durante o período de abril a xuño e utilizando unicamente o líquido atraente proporcionado polo departamento municipal de Medio Ambiente. Esta medida busca reducir ao máximo o impacto sobre outras especies e o medio ambiente, concentrando a acción no período de voo das raíñas de avespa asiática.
“"Volvemos apostar por esta campaña porque funciona moi ben, xa que é unha maneira eficaz de poder controlar a avespa velutina. Agora centrarémonos no reparto de líquido atraínte especialmente para raíñas, xa que diminuír o seu número é o mellor xeito de baixar a presenza de numerosas obreiras durante o verán. Posteriormente, o persoal da Aula da Natureza fará un seguimento da campaña e elaborará un informe final sobre o resultado da mesma."
O Concello levará a cabo un seguimento telefónico para identificar as parroquias e zonas con maior incidencia da especie invasora. Ademais, no momento da entrega do líquido, ofreceranse instrucións básicas sobre a correcta colocación das trampas e o uso do atraente. Unha vez finalizado o período de trampeo, informarase sobre a necesidade de retirar as trampas para evitar danos a outras especies.
As persoas interesadas en colaborar poden recoller unha unidade de líquido atraente na oficina de Medio Ambiente da casa consistorial, de luns a venres, en horario de 9:00 a 14:00 horas. Para máis información, pódese contactar a través do correo electrónico auladanatureza@concellodeames.gal ou chamando ao 660 004 665 no mesmo horario. A asignación farase por orde de solicitude ata esgotar as unidades dispoñibles.
