A actuación, que conta cun orzamento de 175.536,15 euros, foi adxudicada para renovar os percorridos peonís mediante a instalación de formigón con mallazo sobre unha base de zahorra. O proxecto tamén contempla a mellora da rede de recollida de augas pluviais, incorporando novas canalizacións e reixas de fundición conectadas á rede municipal.
Ademais dos camiños, o plan de obra inclúe a rehabilitación das escaleiras que conectan as rúas Ribeira e Salgueiroas. Os traballos consistirán na demolición dos elementos de bloque actuais, a limpeza dos paramentos e a instalación dunha nova varanda con pasamáns ancorada sobre unha estrutura de formigón armado.
Esta intervención enmárcase dentro do POS+ Adicional de 2025. Con esta nova fase, o investimento total acumulado na urbanización, sumando as melloras executadas en 2023 a través do plan Ames Progresa, ascende a preto de 400.000 euros destinados á modernización das infraestruturas viarias e peonís da zona.
