A Axencia de Doazón de Órganos e Sangue (ADOS) reitera a chamada á cidadanía para participar na doazón de sangue nas xornadas previas e posteriores á ponte festiva do 12 de outubro. A entidade destaca a necesidade de manter unhas reservas adecuadas, especialmente dos grupos A Positivo, O Positivo e O Negativo.
As datas festivas adoitan provocar unha lixeira diminución na participación, o que repercute nas reservas sanguíneas. Por iso, ADOS salienta a importancia de acudir a doar ao longo desta semana, xa que os hospitais galegos requiren aproximadamente 400 doazóns diarias para soster a súa actividade asistencial.
A doazón poderá realizarse nos puntos de atención ao doador das sete cidades galegas ou nas unidades móbiles que visitarán preto de corenta concellos ata finais da próxima semana.
A intensa actividade dos hospitais galegos, que inclúe unha media de 2.800 urxencias, 800 intervencións cirúrxicas e un transplante de órganos diarios, ademais de 1.600 atencións nos hospitais de día, depende en gran medida do sostemento de compoñentes sanguíneos.
Para máis información, ADOS pon a disposición o seu portal web ados.sergas.gal, as súas redes sociais e o teléfono gratuíto 900 100 828.
